ـ1ـ
يا الياس جايي خبّرك شو كان
بيّك في حلوه كتير جنّنتو
شرّف ع سيدني ووجّ إمّك بان
ما عرفت وجّو كيف لوِّنْتو
ومحسوبك بيفهم حكي الخلاّن
عرسُن بإسم الربّ عنونتو
بيّك حبيب القلب.. شو إنسان
بغربه غريبه صانّي وصنتو
وإمّك بـ رسما جمّلت ألوان
ولولا جمالا ما تكوّنتو
ـ2ـ
بعيني إنت.. بالقلب إنتَ كْمان
صيتك بمعجنة السما عجنتو
جرّبت مجدك زين بالميزان
بإلماز وبأغلى دهب زنتو
بسمّيك إبن العزّ والإيمان
غمرت المحبّه والوفا حضنتو
جدّك بطل شرّف إسم لبنان
وجدّك ملَك.. والمملكه إنتو
ـ3ـ
نقّيت أجمل بنت بالهجران
بيّا تعب تا يفرح ببنتو
وإمّا بـ حبّا سوسحت أكوان
قلب الحجر بالعطف ليّنتو
نيكول سيميك.. إسمها رنّان
الخاتم بـ أجمل إيد زيّنتو
بهنّي الأهل بـ أجمل العرسان
بالعرس أحلى تنين بيّنتو
رح ذكّرك يا الياس بالأوطان
بـ مجدليا مزار مار الياس
عليك وعلى نيكول إمّنتو
