ـ1ـ
تغنّج يا شلح الأرز ببلادي
يا تاج أعلى جْبال منصانه
بلونك الأخضر فرحت الوادي
ورندح البلبل أجمل غناني
ـ2ـ
شلشك إذا بْيِمتدّ بزياده
بيرخص إلو الدّم الـ بِشرياني
بقلوبنا زرعوك أجدادي
منشان ينمى فكر إنساني
ـ3ـ
يوزّع ع كل الكون أمجادي
وبأرض سيدني يشعّ إيماني
بركع بصلّي العمر للفادي
يردّ الغضب عن أرض منهانه
ـ4ـ
يا أرز، فوق السطح عم نادي
وما همّ لولا بيتعب لساني:
شربل بعيني بيعبُد عباده
بيرق بيوحّد شعب لبناني
**
