كتبتها بعمر 15 سنة
زَقْزِقِي وْغَنِّي مَعِي يَا طْيُورْ
السَّهْرَهْ بْأَوَّلْهَا
وِتْجَمَّعِي بْبَاقِةْ فَرَحْ يَا زْهُورْ
حَابِبْ تَا غَازِلْهَا
وْيَا هَالنُّجُومِ الْبِالسَّمَا
قَلْبِي أَنَا مَسْرُورْ
شِعِّي بْعَتْمَاتِ الْحِمَى
لا تِبْخَلِي بِالنُّورْ
عَارِفْ أَنَا.. فَوْقِ الْخَلِيقَهْ سَاهْرَهْ
يَا حْبُوبْ مِنْ إِلْمَاسْ
صِيرِي عَقِدْ عَ صَدِرْهَا.. شُو نَاطْرَهْ
تَا يِحِسْدُوهَا النَّاسْ
سِتِّ الْحَلا عَمْ تِزْرَعِ الْمِشْوَارْ
عَ دْرُوبْ أَحْلامِي
كِرْمَالْهَا.. بِمْشِي عَ جَمْرِ النَّارْ
تَا قِلّْهَا نَامِي
وْلَنُّو دَقِيقَهْ بَسّْ
عَ زْنُودْ مِنْ أَزْهَارْ
وِتْغِيبْ عَنَّا الشَّمْسْ
وِنْهَارْ يِطْفِي نْهَارْ
**
